🥀☘️🌺🥀☘️🌺🥀☘️🌺🥀☘️🌺🥀
س: بنتى في الصف الثاني الثانوى وتواصلت مع شاب وأقنعها إنه بيحبها وإنه عايز يتجوزها، واحنا رافضين الفكرة لإن سنها صغير والشاب نفسه مش كويس، ولكن خايفين من تطورات الموضوع اللي ممكن تحصل من ورانا، فرأيك إيه ونعمل إيه؟!
ج: لازم تقعدى مع البنت وتفهميها بأهمية العيلة والأسرة وازاي لازم كلنا نكون ايد واحدة في أي قرار كبير ومهم زي ده.
وفي نفس الوقت تفهميها إن الحب ليه طريقين واحد حلال وواحد حرام، واحد ربنا بيحبه والتاني ربنا بيبغضه.
وإنه بيكون دايماً في سنك تعارض بين مصلحتك ومشاعرك، وفي كل سن بيكون فيه التعارض ده لكن النضج "التفكير السليم" اللي بيجي بالخبرات والصدمات والانجازات والانكسارات، بيخلى المصالح تغلب المشاعر، لإن المشاعر اللي هتفسد مصلحتي في النهاية هتتقلب لمشاعر ندم وممكن تبقى مشاعر كره وبُغض لنفس الشيء اللي كان محبوب زمان!
وفهميها إن البنت لما مشاعرها بتتحرك تجاه حد بتلاقي صعوبة شديدة في إنها تتوقف عن التفكير فيه، لكن لما تفهمي ازاي ممكن اللحظات دي تأخرك كتير عن مستقبلك أو علاقتك بربك وبدرجة خشوعك في صلاتك أو دعاءك أو غيره، هتفوقي لنفسك لكن بعد تعب، وده هيفيدك جداً في المستقبل، وهو إنك هتعرفي يعني إيه ضغوط ويعني إيه احتياجات ويعني إيه اختيارات وازاي توازنى بينهم حتي ولو بصعوبة.
يعني الاستفادة من المواقف الصعبة بتكون أضعاف أضعاف الآلام الناشئة عن مخالفة القلب.
وكإن الخلاصة إن القلب لما بيخالف مصلحتك وبتقدمى مصلحتك، قلبك بيتأذي مؤقتاً وبيوجعك جامد، لكن بعد فترة مصلحتك بتلاقي ثمرتها قدامك وقلبك بيرجع واحدة واحدة لغاية ما يلاقي نفسه ندمان على الوجع اللي فات.
لكن لما بتقدمي قلبك على مصلحتك بتكوني فرحانة قوي في الأول، ولما مصلحتك تفوت منك وتلاقي اللي حواليك متميزين عنك وتلاقي قلبك معدش فرحان زي الأول وواحدة واحدة بينطفي ويتألم، ساعتها بتندمي جامد لإنك بتفقدي الاتنين مصلحتك وقلبك!
الخلاصة: لازم نفهم ولادنا حتى ولو مش عايزين يفهموا، ونحذرهم من مخاطر تفكيرهم حتى ولو مش عاجبهم كلامنا، وناخد قرارات مهمة حتى ولو هتخالف دماغهم، لإن بالوقت هيحبونا أكتر ويرتبطوا بينا أكتر، لإنهم هيشعروا إن رغم كرههم لاختياراتنا في يوم من الإيام إلا إن الحقيقة هتظهر ولو بعد أيام أو شهور أو سنوات، وهيقولوا الحمد لله إن بابا وماما وقفوا جنبي وساعدونى صح بعقلهم مش بمزاجي.
وفي النهاية نحن بدون توفيق الله لنا: لا شيء!
محمد سعد الأزهري
🥀☘️🌺🥀☘️🌺🥀☘️🌺🥀☘️🌺🥀
Mostrar más ...