Умар ибн Хаттоб розияллоҳу анҳу тўрт юз динорни бир халтачага солиб хизматкорига берди ва шундай деди:
– Мана шу пулларни Абу Убайда ибн Жарроҳ розияллоҳу анҳуга олиб бориб бер ва уларни нима қилишини кузатиб тур.
Хизматкор динорларни Абу Убайда розияллоҳу анҳуга олиб борди.
– Амирал-мўъминин сизга ушбу пулларни бериб юборди ва уларни ўз эҳтиёжингизга ишлатишингизни буюрди!
– Аллоҳ уни етиштирсин ва раҳматига олсин! Бу ёққа кел, эй жория. Манави етти динорни фалончига, бештасини фистончига олиб бор, – деб буюрди Абу Убайда розияллоҳу анҳу ва динорларни тарқатиб юборди.
Хизматкор қайтиб келиб, бўлган воқеани гапириб берди. Умар розияллоҳу анҳу яна битта халтачани тайёрлаб қўйган экан.
– Бу динорларни Муоз ибн Жабалга олиб бор ва уларни нима қилишини кузатиб тур, – деди Умар розияллоҳу анҳу.
Хизматкор пулларни Муоз розияллоҳу анҳуга олиб борди:
– Амирал-мўъминин сизга ушбу динорларни ўз эҳтиёжингизга ишлатишингизни буюрди, – деди хизматкор.
– Аллоҳ амирал-мўъмининни етиштирсин ва раҳматига олсин. Эй жория, ушбу динорларнинг мана шунчасини фалон хонадонга, мана шунчасини пистон хонадонга олиб бор, – деди Муоз розияллоҳу анҳу.
Шу пайт Муоз розияллоҳу анҳунинг аёли мўралаб «Аллоҳга қасамки, биз ҳам мискинмиз, бизга ҳам беринг!» деб айтди. Халтачада фақат икки динор қолган экан. Муоз розияллоҳу анҳу уларни аёлига берди.
Хизматкор қайтиб келиб Умар розияллоҳу анҳуга кўрганларини сўзлаб берди. Умар розияллоҳу анҳу жуда хурсанд бўлди.
– Улар чиндан-да биродардирлар, улар бир-бирларидандирлар! – деди Умар розияллоҳу анҳу.
@qurontvuzMostrar más ...