Қайноналар
(Ҳазил шеър)
Ўғил туғиб хурсанд бўлган сиз оналар,
Орзу этиб бўлишни сиз қайноналар,
Сеп-у сарпо тўпладингиз йилу ойлар,
Келин олинг, насиб этсин яхши жойлар.
Кимда қиз бор дея энди қидирасиз,
Ўқимишли ўғлим дея кериласиз,
Совчи бўлиб не остоналар борасиз,
Яхши келин излаб энди оворасиз.
Келин келсин шу уйимга эпли дея,
Ҳам иболи, сарполи-ю, сепли дея,
Неча уйлар кезиб ковушни йиртасиз,
Зўр қайнона бўлиш орзусин этасиз.
Ўғил туғиб керилган сиз қайноналар,
Ҳавас қилсин сизга дўсту бегоналар,
Тор кулбангиз бўлсин энди кошоналар,
Келинингиз бўлсин сизга парвоналар.
Яхши келин келса сизга қиз бўлади,
Ёмон бўлса ўғлингиздан айиради,
Гапирсангиз қошларини қайиради,
Йиллар ўтиб қандай бўлар, ким билади?
Келин олиб керилган сиз қайноналар,
Хом ҳаёлга берилган сиз қайноналар,
Уйингизга ўзга уйдан келин келди,
Сирингизни билар энди бегоналар.
Яхши келин келса уйлар нурга тўлар,
Музлатгич гўшт, омборлар ёғ, унга тўлар,
Рўзғорда йўл қўя кўрманг камчиликка,
Устингиздан энди қуда-анда кулар.
Келин бор деб энди овозни пастлайсиз,
Эрта-ю кеч не қилай деб бош қашлайсиз,
Қаттиқ сўзлар, жавранишларни ташлайсиз,
Қош-қовоғига термулиб, дил ғаштлайсиз.
Яхши ўғил туғдим дея керилдингиз,
Афсус, ўғилни келинга бой бердингиз,
Силаб-сийпаб катта қилган қўзингизни,
Қул қилади энди келин ўғлингизни.
Ишни чала қилса энди индамайсиз,
Ўғлингизни ёнингизга имламайсиз,
Кўп чиқади хийлалари,билмайсизда,
Кўзни юмиб барчасига чидайсизда.
Қулоғингиз тинч бўлишин истасангиз,
Аразларин, гиналарин кўтарсангиз
Талқон солиб оғзингизга ўтирсангиз
Зўр қайнона сиз бўласиз, гар билсангиз.
Яхши ўғил туғиб берган қайноналар,
Келинингиз бўлсин сизга парвоналар,
Қилайверинг сиз уларни кўп дуолар,
Ҳавас этсин сизга дўсту бегоналар!
Юлдуз Алимова
Ko'proq ko'rsatish ...