“ПАХТАМИЗНИ “ҚОДИР ТЕКСТИЛ” ГА ТОПШИРМАЙМИЗ!”
Олтинкўл туманидаги бир гуруҳ фермерлар номидан мурожааат қилмоқдамиз. Бўстон туманида “Сайёра фаввораси” МЧЖ пахта-тўқимачилик кластери бор.
Бизнинг туманимиз фермерлари пахта ҳосилини мажбуран, ҳокимият босими остида мана шу кластерга топширарди. Ваҳоланки, “Сайёра фаввораси” ни фермерлардан миллиардлаб қарзи бор. Ўтган 2023 йилги пахта пулини қўятуринг, ҳатто, 2022 йили ҳақларимизни ҳам ололганимиз йўқ.
Президентимиз Шавкат Миромонович: “Фермерлар маҳсулотини хоҳлаган кластерига топширсин. 2-3та кластер билан ишласин, рақобат бўлсин”, деганида фермерлар роса суюнганди. Аммо кластер раҳбари Ботир Қодиров дарров яна битта кластер ташкил этиб олиб, номини “Қодир текстил” деб номлади. Ва фермерлар пахтани энди “Қодир текстил” га топширадиган бўлди.
Лекин у кластер ҳам, бу кластер ҳам бир гўр, сабаби ҳар иккаласининг ҳам эгаси битта одам – Ботир Қодиров.
Жорий йил баҳорда пахта сотиш бўйича Фьючерс шартномасини Балиқчи туманидаги “Скортон текстил” МЧЖ билан имзоладик. Энди “Қодир текстил” билан ишламаймиз, деб турсак, Олтинкўл тумани ҳокими Отавулло Расулов 45 та фермерни тумандаги пахта заводга мажбуран тўплаб олиб, ҳеч қандай шартномани тан олмасдан, пахтамизни “Қодир текстил”га сотишга мажбурлаяпти.
Бу саҳна ҳар куни кечки 19 дан кейин бошланади. Дам олиш вақти бўладими, кечаси бўладими, уйингда ёш гўдагинг борми бу ҳокимга фарқи йўқ. Ёш боласи бор хотин-қизларниям, МФЙ ходимлариниям йиғволиб, “очко” олиш, Ботир бойга яхши кўриниш учун ҳаммага буйруқ қилиб ётибди.
Кечаси соат 12-1 бўлиб кетсаям парвойига келмайди. Фермерларни мажбурлаб, Ботир бойга арзон-гаров маҳсулот ундириб берса бўлди. Кимда ким пахта топширмаса, 10 % жарима тўлармиш. “Хоҳлаган ерингга бор, менга деса ижтимоий тармоқларда чиқарвор. Ҳеч кимдан қўрқмайман, бажарасан, тамом!” – дейди. Биз бир нарсани тушунмаяпмиз.
Нега фермерларни ҳамма эзаверади? Нега Президент айтган гаплар шамолга совурилиб кетаверади? Ё бу гаплар шунчаки матбуот учун айтиладими? Агар ундай бўлмаса, нега кичик бир туманни ҳокимию, бир тумандаги бойвачча Президентимиз сиёсатини менсимайди? Нега қонунларимиз ишламаяпти? Ёки бу қонунлар фақат бой ва “каттакон”лар манфаати учун ишлайдими? Бу саволларимизга жавоб берадиган биронта мулозим, ҳукумат вакили борми?
💬
Telegram |📱
Facebook |
🐦
Twitter |📱
Instagram | ▶️
YouTubeعرض المزيد ...