Экспортчилар учун навбатдаги бюрократик тўқмоқ
Ҳукуматнинг тўқимачилик, чарм-пойабзал ва электротехника маҳсулотлари экспортини тартибга солиш тўғрисидаги қарори қабул қилинган. 13 майдан кучга кирган, тўқимачилик, чарм-пойабзал маҳсулотлари ва электр жиҳозлари бўйича
минимал экспорт нархларини жорий этиш масаласидаги қарорга нисбатан истеъмолчи сифатида ҳам эътирозлар бўлмаслиги мумкин эмас.
Биринчидан, бу бизнес юритишни ёмонлаштирувчи қоидалар ҳисобланади, шунинг учун, янги қоидалар
эълон қилинганидан камида 3 ойдан кейин кучга кириши керак. Ёки Ҳукумат қарори Қонундан яна бир марта устун кўриладими?
Иккинчидан, тадбиркорлик субъектларига оид ҳар қандай ўзгаришлар Савдо саноат палатаси
Жамоатчилик кенгаши муҳокамасидан ўтиши керак. Тадбиркорликни қўллаб-қувватлаш бўйича Жамоатчилик кенгаши бунга розилик берганми?
Учинчидан, минимал экспорт нархлари белгиланадиган маҳсулотлар рўйхати очиқланиши ва доим очиқ бўлиши керак. Акс ҳолда, қанақадир тийиқсиз чиновник истаса, рўйхатга маҳсулотни киритиб, истаса чиқариб, истаган нархни қўйишга шароит туғилади.
Тўртинчидан, Ўзтўқимачиликсаноат, Ўзчармсаноат, Ўзэлтехсаноат каби псевдовазирликлар бутунлай тугатилмас экан, улар ўзларини заруриятини асослаш учун ўзлари назорат ва тақиқ қоидалари ўйлаб топишаверади. Бу динозавр уюшмаларнинг бизнесга заррача фойдаси йўқ, кимгадир мабодо фойда кўрсатишса ҳам, айтайлик, қанақадир олигархларнинг манфаатларига лоббистлик қилиши, қолганларнинг зиёнига ишлаши мумкин холос.
Бешинчидан, оқибатлар билан курашаётган бу қарорлар билан экспорт ошиб қолмайди, лекин тийиқсиз бюрократиянинг ёмон қадамлари фақат қаттиқлашиб боради. Қарор билан май ойи бошидан жорий этилган мева-сабзавот маҳсулотларининг
тавсия этиладиган экспорт нархлари минимал мақбул нархларга алмаштирилмоқда. Бундай буёғига яхшироқ ўзгаришларни кутиш керак эмасга ўхшаяпти.
Ваколати кенгайишда давом этаётган бюрократиядан янги тўқмоқларни қабул қилаётган экспортчилар бу ўзгаришлар бўйича ўз муносабатини билдириши керак.
Show more ...