#қисқа_савол_жавоблар
МУЗОРАБАДА ҲАР ОЙ ФОЙДАНИ ТАҚСИМЛАШ МУМКИНМИ?
❓
CАВОЛ: Шерикчиликда бир дўстим билан иш бошладим, шеригим мен қилаётган бизнесга пул тикди, фойдани тенг шерикликка келишдик, ҳар ойда фойдани пулини олиб турсак бўладими?
💬
ЖАВОБ: Бисмиллаҳир Роҳманир Роҳим.
Сизларнинг шартномангиз
“Музораба” шартномаси бўлиб, бунинг баёни фиқҳ китобларида қуйидагича келтирилади:
هي عقد شركة فى الربح بمال من رجل و عمل من الاخر
яъни:
“Музораба бир кишидан мол ва бошқасидан иш ўлароқ фойдада шерикчилик битимидир" ("Ихтисорур ривоя" китоби). Демак, Музорабада дастмоя бир томондан, хизмат иккинчи томондан бўлади. Молнинг эгаси ишчи билан келишиб, молни унга беради. Тушган фойда келишувга асосан муайян бир миқдорда эмас, балки фоиз ҳисобида тақсимланади. Масалан: “Фойданинг ярми меники, ярми сеники ёки учдан бири меники, учдан иккиси сеники ва ҳоказо. Агар зарар бўлса, музораба шартномасида мол эгаси пулига, ишчи эса қилган меҳнатига куяди.
Музорабада фойдани бўлиб олиш муддати иш турига боғлиқ. Савдо-сотиқ бўлса, олинган нарса тўлиқ сотилгандан кейин ҳисоб-китоб қилинади. Агар деҳқончилик каби ишлар бўлса, ҳосил олингандан кейин фойда бўлиб олинади. Лекин аввал дастлабки сармояни ўз ўрнига қўйиб, кейин соф фойда келишилган нисбатда бўлиб олинади.
Музорабада икки томондан бири учун муайян сумма таъйин қилинса, музораба бузилади. Масалан, фойдадан менга юз дирҳам (доллар) берасан, қолгани сенга деса музораба дуруст бўлмайди.
("Ал-мухтасар фил фиқҳил ҳанафий" китоби). Чунки икки томондан бирига зарар бўлиб қолиши эҳтимоли ҳам бор.
Шунингдек, музорабада пул берувчи: “Сенга қанча пул берган бўлсам, нима бўлган тақдирда ҳам шу пулимни тўлиқ қайтарасан”, – деса ҳам, музораба бузилади. Валлоҳу аълам.
📖 Манба: Ўзбекистон мусулмонлари идораси Фатво ҳайъати.
@diniysavollar да берилган фатво асосида тайёрланди.
┈•┈•┈•⊰✿📖✿⊱•┈•┈•┈
📝
Ислом молияси қўшимча изоҳи: Ислом молияси қўшимча изоҳи: агар бизнес цикл якунига етмасдан тушган жорий "фойдадан" томонлар улуш олиб туришса, бу қарз ҳисобланади. Бизнес жараён тўлиқ якунига етганда ва "ғалвир сувдан кўтарилганда" молиявий ҳолат қанақалигига қараб якуний фойда тақсимоти амалга оширилади. Шунда бизнес фойда эмас, зарар билан якунлагани маълум бўлса, у ҳолда томонлар жорий "фойдадан" олган улушларини ўртага қайтиб қўйишади ва қайта ҳисоб-китоб қилишади. Агар зарар билан чиқилган бўлса, сармоядор тиккан пулига (қанча зарар кўрилган бўлса ўшанга кўра), иш юритувчи - музориб эса меҳнатига куяди. Фойда кўрилган бўлса, бошидаги келишувга кўра томонлар ўртасида тақсимланади.
🔗
@IslomMoliyasi каналиShow more ...