⚡️⚡️⚡️
Қуллуқ
Эсладинг мен заррангни - оғриқларингга қуллуқ,
Танимни зирқиратган борликларинггга қуллуқ,
Кундуз ризқин терсин деб пасайтирдинг азобинг,
Тунда юборган қайта корликларингга қуллуқ.
Зарбоф кийгач, унутдим жулдуримни, боримни,
Ушоқларни излаган муҳтож куним, зоримни.
Йўқликдан рўза тутган ибодатим, оримни,
Ўтмишимни эслатган чориқларингга қуллуқ.
Ҳар санчиқда бир бора бориб келдим ёнингга,
Гоҳ шукрим, гоҳ арзимни ёриб келдим ёнингга,
Дединг: «Сажда ва тавба оро кирар жонингга»,
Англатмоқ-чун юборган ёриқларингга қуллуқ.
Кимга ёмон сўз дедим, кимларга қилдим шафқат,
Гоҳ шамдек эридиму, гоҳ меҳрим бўлди қаҳат.
Сенгагина хос экан ҳаммага бир муҳаббат,
Хатоларимдан топган ёрлиқларингга қуллуқ.
Учратмадим оламда армони йўқ бекамни,
Ўзингдайин одилу, ўзингдайин ҳакамни,
Тилло заринг керакмас, шунча берганинг камми,
Офатлардан асраган торликларингга қуллуқ.
Мукофотдир синовлар, овозимни чиқармам,
Гуноҳимга каффорат, дейман маҳшарда малҳам,
Қиёматда этмоқ-чун азиз ҳамда мукаррам
Саодатга элтувчи хорликларингга қуллуқ!
Эсладинг мен заррангни - оғриқларингга қуллуқ.
Нурхон Элмирзаева
@Olmaliqhayoti
Каналга уланиш:
https://t.me/+SA-Ow_e4UUq1kgRE
Online mustang taxi 📲 1052
Mostrar más ...