#премьера
Ўзимдан ўзимга келар кўп жабр,
Ўзимнинг борлигим ўзимга малол.
Кундузларим бардош, тунларим сабр,
Кетганингдан бери ҳар кун шу аҳвол!
Қудратли қўшиндек жанг қилар малъун,
Берилмай қолинган охирги савол.
Нега?
Ва ёки қайси бир гуноҳим учун?
Кетганингдан бери ҳар кун шу аҳвол!
Дўзохидан қочиб, қошимда нозир,
Соғинч деб аталган бир кўзли дажжол.
Менинг ҳам яшашга ҳаққим бор ахир?!
Кетганингдан бери ҳар кун шу аҳвол!
Қалбни ўғирлашга қилмадинку ор,
Керакми, ол, хаста юракни ҳам ол.
Бу дарднинг на дори, на табиби бор,
Кетганингдан бери ҳар кун шу аҳвол!
Зафарон рангимдан хижолатда куз,
Сенингчи, ҳануз ҳам яноқларинг ол.
Босиб яшаяпман юрагимга муз,
Кетганингдан бери ҳар кун шу аҳвол!
Сендан хафамасман, кўнглинг бўлсин тўқ,
Хатонинг ҳаммаси менда, эҳтимол.
Йўлингни пойлашдан бошқа ишим йўқ,
Кетганингдан бери ҳар кун шу аҳвол!
Малика Тавфиқ
Ko'proq ko'rsatish ...